«Қобалжуды сенімге айналдыр»: 4 «Б» сыныбының ББЖМ-ға дайындығы

2026 жылғы 4 мамыр күні мектебімізде 4 «Б» сынып оқушыларына арналған «Қобалжуды сенімге айналдыр» атты практикалық тренинг ұйымдастырылды.

Тренингтің негізгі бағыты - 4 «Б» сынып оқушыларының білім алушылардың білім жетістіктеріне мониторингі (ББЖМ) алдындағы үрейін басып, өз күшіне деген сенімін арттыру болды.

Тренингтің мақсаттары:

• Стресске төзімділікті қалыптастыру: Қиын сәттерде өзін-өзі басқару дағдыларын дамыту.
• Эмоциялық қолдау: Оқушылардың зейінін шоғырландырып, эмпатия сезімін ояту.
• Сенімділік: Эмтихан тапсыру кезіндегі тиімді стратегияларды меңгерту.

Тренинг барысында 4 «Б» сыныбының оқушылары психологиялық тұрғыдан ширатуға бағытталған бірнеше кезеңнен өтті:

1. «Сәлемдесу» және «Көңіл-күй» суреті: Оқушылар ерекше тәсілдермен (иықпен, тіземен, арқамен) амандасып, көңіл-күйлерін көз жұма отырып ақ қағазға бейнеледі.
2. «Сенімділік бейнесі»: Әр оқушы өзіне күш беретін символдарды салып, ішкі сенімділігін нығайтуды үйренді.
3. «Ми гимнастикасы» және Зейін жаттығулары: «Құлақ-мұрын», «Жалқау сегіздіктер» жаттығулары арқылы мидың екі жарты шарын іске қосып, логикалық ойлауды жақсартты. Екі қолмен бірдей сурет салу тапсырмасы балалардың қызығушылығын ерекше тудырды.
4. Интеллектуалды сергіту: «Тыйым салынған сан» және «Атомдар мен молекулалар» ойындары арқылы оқушылар зейінді шоғырландыру мен топта жұмыс істеуді бекітті.

Тренинг соңында 4 «Б» сынып оқушылары «Сенім хатын» жазып, бір-біріне сәттілік тіледі. Рефлексия барысында балалар өздеріне ұнаған жаттығулармен бөлісіп, алдағы сынаққа жоғары дайындықпен және жақсы көңіл-күймен баратындарын сеніммен жеткізді. 

Педагог-психолог Базарова Э.Н.

Сынып жетекші Сапакова К.А.